შალვა პაპუაშვილი ევროპის საბჭოს გენერალურ მდივანს შეხვდა
საქართველოს პარლამენტის თავმჯდომარე შალვა პაპუაშვილი ევროპის საბჭოს გენერალურ მდივან მარია პეიჩინოვიჩ ბურიჩს შეხვდა.
პარლამენტის პრესსამსახურის ინფორმაციით, მხარეებმა ხაზი გაუსვეს საქართველოსა და ევროპის საბჭოს შორის მრავალწლიან ნაყოფიერ თანამშრომლობას.
„შალვა პაპუაშვილმა ევროპის საბჭოს გენერალურ მდივანს მადლობა გადაუხადა საქართველოს ტერიტორიული მთლიანობისა და კონფლიქტის მშვიდობიანი მოგვარების მხარდაჭერისთვის. ამ კუთხით, მან ყურადღება გაამახვილა ევროპის საბჭოს გენერალური მდივნის კონსოლიდირებული ანგარიშის - „კონფლიქტი საქართველოში" - მნიშვნელობაზე.
შალვა პაპუაშვილმა, აგრეთვე, ისაუბრა ევროკავშირის 12 რეკომენდაციის შესრულების კუთხით საქართველოს მიერ მიღწეულ პროგრესზე და აღნიშნა ევროპის საბჭოს მნიშვნელოვანი წვლილი საქართველოს დემოკრატიულ განვითარებაში.
მარია პეიჩინოვიჩ ბურიჩის თქმით, მისი ვიზიტი საქართველოში მნიშვნელოვანია არა მხოლოდ ოფიციალური შეხვედრების გამართვის თვალსაზრისით, არამედ იმიტომაც, რომ მან მოინახულა საოკუპაციო ხაზი და ევროპის საბჭოს სოლიდარობა გამოხატა ადგილობრივი მოსახლეობისადმი.
გენერალურმა მდივანმა დადებითად შეაფასა საქართველოს კანონმდებლობის ევროპულ სტანდარტებთან დაახლოების პროცესი. მისი თქმით, ევროკავშირის 12 რეკომენდაციის არაერთი საკითხი ევროპის საბჭოს მანდატს განეკუთვნება და აღნიშნა, რომ ევროპის საბჭო მზად არის, მხარი დაუჭიროს საქართველოს ევროკავშირში გაწევრიანების გზაზე“, - ნათქვამია გავრცელებულ ინფორმაციაში.
