პრობლემაა, რომ ისეთი მნიშვნელოვანი კანონის მიღებას, რომელიც თავდაცვას სჭირდება, ეწინააღმდეგებით, - ასე მიმართა ოპოზიციას პარლამენტის თავმჯდომარემ შალვა პაპუაშვილმა, პარლამენტის პლენარულ სხდომაზე.

პაპუაშვილის თქმით, რამდენი დროც არ უნდა დასჭირდეს „თავდაცვის კოდექსის“ პროექტის განხილვას, დასხდებიან და ძალიან მშვიდად და წყნარად განიხილავენ და მიიღებენ.

„ქალბატონი თეონა (აქუბარდია), საკუთარ თავს უსაფრთხოების ექსპერტს რომ ეძახის, ჩიოდა, სამხედრო ნაწილებში ვერ დავდივარო. აი, სამხედრო ნაწილებში რომ მივა, სერჟანტებსა და გენერლებს დაელაპარაკება და ეტყვის, მე ვეწინააღმდეგებოდი და „გირჩს“ პროცედურულ ხრიკებში ავყევი იმისთვის, რომ კანონის მიღება რამენაირად „გამეწელა“ და კოდექსი არ მიგვეღო, ვნახავ, როგორ ჩახედავს მათ თვალებში“, - განაცხადა პაპუაშვილმა პარლამენტის სხდომაზე.

პარლამენტში „თავდაცვის კოდექსის“ პროექტის მეორე მოსმენით განხილვა მიმდინარეობს. განხილვის პროცესში აქტიურად მონაწილეობს ოპოზიცია, რომელსაც მმართველი გუნდი დროის ხელოვნურად გაყვანაში ადანაშაულებს.