ჩვენ გვყავს ძალადობისკენ მოწოდებების, პარლამენტში გინების, ცხვირ-პირის დალეწვის ლეგიტიმაციის და შესაბამისი გზავნილების გამავრცელებელი ხელისუფლება - დაწერილი და დაუწერელი ზოგადსაკაცობრიო კანონია, რომ დაღმასვლის გზაზე დამდგარი რეჟიმები ძალადობაზე გადადიან, - ეს განცხადება ჟურნალისტებთან პოლიტიკური ჯგუფის „ლელოს“ ხელმძღვანელმა დავით უსუფაშვილმა გააკეთა.

უსუფაშვილის თქმით, „ქართულმა ოცნებამ“ ძალიან კარგად იცის, რომ ვერანაირი ძალით დამატებით ამომრჩეველს ვერ მოიზიდავს, ამასობაში კი დემოკრატიისა და ევროპისკენ განწყობილი ამომრჩეველი ნელ-ნელა ზურგს აქცევს და აქვს ამოცანა, შეინარჩუნოს ამომრჩეველი, რომელიც მას ჰყავს.

„ჩვენ გვყავს ხელისუფლება, რომელიც ამბობს, რომ ოპოზიცია, მედიის ნაწილი და ახლა უკვე პრეზიდენტი სახელმწიფოს საწინააღმდეგოდ მოქმედებს - ვართ აგენტები უცხო ძალის ხელში. პატრიოტმა ქართველმა, ვისაც ამის სჯერა, რა უნდა გააკეთოს? - ქვეყანა მტრებისგან უნდა დაიცვას. ამიტომ ვიღებთ ამდენ უბედურებასა და ძალადობას, რომელიც თუ კონტროლიდან ბოლომდე გამოვიდა, ქვეყანა სერიოზულ უფსკრულში ჩაიძირება“, - განაცხადა დავით უსუფაშვილმა.