პოლიციამ არათუ არ უზრუნველყო ძალადობის შეჩერება, არამედ ყველაფერი გააკეთა იმისთვის, რომ მოძალადეებს დაერბიათ ღონისძიება - სამწუხაროდ, ამ ქვეყანაში შეუძლებელია პოლიციის იმედი გქონდეს, - ასე გამოეხმაურა „ნაციონალური მოძრაობის“ დეპუტატი, ანა წითლიძე „თბილისი პრაიდის“ ფესტივალის ირგვლივ განვითარებულ მოვლენებს.

მისივე თქმით, პოლიცია ანტისაოკუპაციო აქციებს შლის გაზით, წყლის ჭავლით, რობოკოპებით, სამოქალაქო აქტივისტებს აკავებს, მაგრამ რეალურად, სადაც უნდა აღკვეთოს ძალადობა იქცევა ისე, როგორც „ქართული ოცნების“ ფილიალი.

„ჩვენ ვნახეთ, რომ პოლიციამ არათუ არ უზრუნველყო ძალადობის შეჩერება, არამედ ყველაფერი გააკეთა იმისთვის, რომ მოძალადეებს ჰქონოდათ შესაძლებლობა გაეკეთებინათ ის, რაც გააკეთეს - დაერბიათ ღონისძიება და სამარცხვინოა, როდესაც პოლიცია ანტისაოკუპაციო აქციებს შლის გაზით, წყლის ჭავლით, რობოკოპებით, აკავებს სამოქალაქო აქტივისტებს, მაგრამ რეალურად, სადაც უნდა აღკვეთოს ძალადობა იქცევა ისე, როგორც „ქართული ოცნების“ ფილიალი. ერთი რამე არის ნათელი, რომ სამწუხაროდ, ამ ქვეყანაში შეუძლებელია გქონდეს პოლიციის იმედი“, - განაცხადა ანა წითლიძემ.