„რუსულმა ოცნებამ“ პროცედურული ომი გამოაცხადა, ნაცვლად იმისა, რომ შინაარსობრივად და დეტალურად მომხდარიყო ისეთი მნიშვნელოვანი კანონის განხილვა, როგორიც „თავდაცვის კოდექსია“ - გაწვევის წესი კორუფციის უდიდეს საფრთხეს აჩენს, - ამის შესახებ საპარლამენტო ფრაქცია “ნაციონალური მოძრაობის” თავმჯდომარე თინა ბოკუჩავამ “თავდაცვის კოდექსთან” დაკავშირებით ჟურნალისტებს განუცხადა.

მისი თქმით, სამხედრო სამსახურში გაწვევის ახალი წესი “კორუფციის ახალი ხვრელი გახდება”.

„დაჩქარებული წესით განიხილავენ „თავდაცვის კოდექსს“ და ცდილობენ, მეორე მოსმენით მიიღონ რიგგარეშე სხდომაზე. ფაქტობრივად, ამისთვის მოიწვიეს რიგგარეშე სხდომა. რაც შეეხება შინაარს - მთავარი პრობლემა გაწვევის წესია, რომელიც კორუფციის უდიდეს საფრთხეს აჩენს, განსაკუთრებით ივანიშვილის რეჟიმის პირობებში, რომელიც კორუფციაზე დგას. ეს კორუფციის ახალი ხვრელი გახდება. ნაცვლად იმისა, რომ ქვეყანაში სწორი გაწვევის სისტემა იყოს. ქვეყნისთვის, რომელიც ოკუპირებულია, ეს მნიშვნელოვანი საკითხია“, - განაცხადა თინა ბოკუჩავამ.

შეგახსენებთ, რომ პარლამენტის დღევანდელ რიგგარეშე სხდომაზე „თავდაცვის კოდექსის“ მეორე მოსმენით განხილვა მიმდინარეობს. მომხსენებელი თავდაცვის მინისტრის მოადგილე გრიგოლ გიორგაძეა.