„ქართული ოცნების“ თავმჯდომარის, ირაკლი კობახიძის განცხადებით, მოქმედი „თავდაცვის კოდექსის“ საშუალებით ორი პარტია ქრთამს იღებდა იმაში, რომ ადამიანებს სამხედრო გაწვევისთვის თავი აერიდებინათ.

მისივე თქმით, ოპოზიცია ახალი „თავდაცვის კოდექსის“ მიღებაზე შფოთავს, რადგან შემოსავლის წყაროს დაკარგავენ.

„ერთადერთი მიზეზი, რატომაც ოპოზიცია შფოთავს, არის ის, რომ მათ შემოსავლის წყარო დაკარგეს - კონკრეტულმა ოპოზიციურმა პარტიებმა, ორმა პარტიამ შემოსავლის წყარო დაკარგა. ისინი ქრთამს იღებდნენ იმაში, რომ ადამიანები თავს სამხედრო გაწვევას არიდებდნენ. ეს არასწორია, რა თქმა უნდა, სასურველი და აუცილებელია სისტემის მოწესრიგება, როგორც გაწვევის ნაწილში და ზოგადად თავდაცვის სფეროში, ამას ეს „თავდაცვის კოდექსი“ ემსახურება, რომელიც არის წარმოდგენილი. მიმდინარეობს განხილვა საკმაოდ ინტენსიურად, ყველას აქვს შეკითხვების დასმის საშუალება, პასუხების მიღების საშუალება და დაველოდოთ, თუ როგორ დასრულდება ეს პროცესი. რა თქმა უნდა, აუცილებელია „თავდაცვის კოდექსის“ მიღება, იმისათვის, რომ კიდევ უფრო გავაძლიეროთ ჩვენი ქვეყნის თავდაცვისუნარიანობა“, - განაცხადა კობახიძემ.