ილიაუნის ემერიტუს-პროფესორი მზაღო დოხტურიშვილი ფრანკოფონიისა და კულტურათშორისი დიალოგის ორდენით „პლეადა“ დაჯილდოვდა

4-8 ივლისს, საქართველოში გამართულ ფრანკოფონიის საპარლამენტო ასამბლეის 48-ე სესიაზე, ფრანკოფონიის საპარლამენტო ასამბლეის პრეზიდენტმა ფრანსის დრუენმამ ილიას სახელმწიფო უნივერსიტეტის ემერიტუს-პროფესორ მზაღო დოხტურიშვილს გადასცა ფრანკოფონიისა და კულტურათშორისი დიალოგის ორდენი „პლეადა“, - ამის შესახებ ინფორმაციას ილიას სახელმწიფო უნივერსიტეტი ავრცელებს.

„ილიას სახელმწიფო უნივერსიტეტი ულოცავს ქალბატონ მზაღოს ფრანკოფონიისა და კულტურათშორისი დიალოგის ორდენს, მრავალმხრივი მოღვაწეობის მნიშვნელოვან აღიარებას. ორდენი „პლეადა“ დაწესდა 1976 წლის 30 აპრილს ნიუ-იორკში, გაერთიანებული ერების ორგანიზაციის შტაბ-ბინაში, ფრანკოფონიის საპარლამენტო ასამბლეის მე-7 პლენარულ სესიაზე. ამ საერთაშორისო ჯილდოს მიზანია, იმ პირთა დამსახურების აღნიშვნა, რომელთაც თავი გამოიჩინეს ფრანკოფონიის იდეალების სამსახურში.

ორდენის სიგელზე, მარჯვენა ზედა კუთხეში, იკითხება ყოფილი პარლამენტარის, სენეგალის რესპუბლიკის ყოფილი პრეზიდენტის, ენათმეცნიერისა და პოეტის, საფრანგეთის აკადემიის წევრ ლეოპოლდ სედარ სენგორის სიტყვები: Les mots du français rayonnent de mille feux comme les diamants de la Pléiade – ფრანგული სიტყვები პლეადის ვარსკვლავებით ათასფრად ანათებენ“, - აღნიშნულია ილიას სახელმწიფო უნივერსიტეტის მიერ გავრცელებულ ინფორმაციაში.