„ნაციონალური მოძრაობის“ თავმჯდომარემ, ლევან ხაბეიშვილმა გავრცელებულ ინფორმაციას, რომ გიორგი ვაშაძე შესაძლოა, „ნაციონალური მოძრაობის“ პრემიერ-მინისტრობის კანდიდატი იყოს, სისულელე უწოდა.

ხაბეიშვილის განცხადებით, „სტრატეგია აღმაშენებელთან“ პრემიერ-მინისტრობის კანდიდატის შესახებ რაიმე სახის კონსულტაცია არ მიმდინარეობს.

„ჯერ არ არის არჩევნები ჩანიშნული. არ ვიცით რა კონფიგურაცია იქნება. სრული სისულელეა რამე თანამდებობებზე, მათ შორის, პრემიერ-მინისტრობაზე მსჯელობაც კი. ჩვენ ქვეყანას უმნიშვნელოვანესი გამოწვევა აქვს, რომელიც უკავშირდება ევროკავშირის კანდიდატის სტატუსს, გაგვარუსებენ ბოლომდე თუ ვერ შეძლებენ, ამიტომ ყველა ასეთი თემა მოგონილია და ყურით მოთრეული. ამაზე მსჯელობა არ ყოფილა. სისულელეა და სიგიჟეა, რომ დღეს ვინმემ რამე თანამდებობაზე ისაუბროს, როცა რუსული პარტია ქვეყნის გარუსებას აპირებს. ტყუილია, რომ რამე მსჯელობა მიმდინარეობს“,- განაცხადა ხაბეიშვილმა.

მისივე თქმით, სხვადასხვა პარტიებთან კონსულტაციები არ მიმდინარეობს საკითხებზე, რომელიც თანამდებობას ეხება.

ხაბეიშვილის თქმით, ორივე პარტიას საჯაროდ აქვს გაცხადებული, რომ ერთმანეთთან აქვთ კონსულტაცია.

„რაც შეეხება თანამშრომლობას და კონსულტაციას, დაწყებული გვაქვს და ვსაუბრობთ, გავაგრძელებთ კონსულტაციებს, მაგრამ ეს კონსულტაციები არ ეხება თანამდებობებს. ეს ეხება ოპოზიციის საერთო სტრატეგიას და ბრძოლის გეგმების განსაზღვრას და თანამშრომლობას. შემიძლია დაგიდასტუროთ, რომ სხვადასხვა პოლიტიკურ პარტიებთან ვსაუბრობთ, რომელიც ეხება რუსი ოლიგარქის დამარცხების გეგმებს და არა რამე თანამდებობებს და ა.შ.

კონსულტაციები მიმდინარეობს, მათ შორის “სტრატეგია აღმაშენებელთან” და სხვა პოლიტიკურ პარტიებთან. შედეგების შესახებ საზოგადოებას აუცილებლად ექნება ინფორმაცია“,- განაცხადა ლევან ხაბეიშვილმა.