ცალკე აღებული გიორგი ვაშაძე, როგორც პოლიტიკურ ლიდერს, რამე ელექტორალური წონა აქვს? ჩვენ ვიცით მისი წარმატებები თბილისის მერობის არჩევნების დროს, რაც კატასტროფა იყო. ამით „ნაციონალური მოძრაობა“ რას იგებს?, - ამის შესახებ პოლიტოლოგმა, ვახტანგ ძაბირაძემ განაცხადა, რითაც შეაფასა გავრცელებული ინფორმაცია, რომ გიორგი ვაშაძე შესაძლოა, „ნაციონალური მოძრაობის“ პრემიერ-მინისტრობის კანდიდატი იყოს.

როგორც ძაბირაძემ „პალიტრანიუსის“ გადაცემა „რეზიუმეში“ განაცხადა, პარტია „ნაციონალური მოძრაობის“ პრემიერ-მინისტრობის კანდიდატად, გიორგი ვაშაძის დასახელება, შესაძლოა, უკავშირდებოდეს პარტიის თავმჯდომარის, ლევან ხაბეიშვილის ჩანაცვლებას და მის მეორე პლანზე გადაყვანას.

„უფრო საქილიკოა, ვიდრე საინტერესო. ვაშაძე „ნაციონალური მოძრაობის“ ერთ-ერთი აქტიური წევრი იყო, შემდეგ გამოეყო, შემდეგ ისევ შეუერთდა. რეალურად ეს ფაქტი არაფერს ცვლის. არ ცვლის, არც პოლიტიკური თვალსაზრისით, არც ელექტორალური თვალსაზრისით. როდესაც ვაშაძე „ნაციონალურ მოძრაობას“ გამოეყო, მისი ელექტორატის ძირითადი ნაწილი „ნაციონალური მოძრაობის“ ელექტორატი იყო. ახლა რომ შეუერთდება, იგივე ელექტორატს შეუერთებს. ცალკე აღებული ვაშაძე, როგორც პოლიტიკურ ლიდერს რამე ელექტორალური წონა აქვს? ჩვენ ვიცით მისი წარმატებები თბილისის მერობის არჩევნების დროს, რაც კატასტროფა იყო. ამით „ნაციონალური მოძრაობა“ რას იგებს? შესაძლოა, ეს იყოს ერთ-ერთი სვლა, იმისათვის რომ ხაბეიშვილი რბილად ჩაანაცვლონ“, - განაცხადა ძაბირაძემ.

მისივე შეფასებით, „ნაციონალურ მოძრაობას“ წინა საარჩევნოდ, გარდა პარტია „სტრატეგია აღმაშენებლისა“, შესაძლოა შეუერთდეს "დროა", პარტია „კანონი და სამართალი" და „გირჩი - მეტი თავისუფლება“ .

„საარჩევნოდ „ნაციონალური მოძრაობის“ ბლოკს სხვა სახელი ექნება და ამ სხვა სახელის სათავეში ვაშაძე იქნება, ხოლო ხაბეიშვილი მეორე პლანზე გადავა.

„ნაციონალური მოძრაობის“ დღის წესრიგში დგას ხაბეიშვილის პრობლემა, რა უყონ არ იციან. ამასთან, მელია აქტიურდება. გუნდი, რომ წარმოვიდგინოთ, გარდა თაკო ჩარკვიანისა, მას შეუერთდება ელენე ხოშტარია და „გირჩი“, სავარაუდოდ, ეს გაერთიანება შეიძლება ვიხილოთ“, - განაცხადა ძაბირაძემ.