„სტრატეგია აღმაშენებელთან” ურთიერთობის საკითხებზე პოლიტსაბჭოზე განხილვა არ ყოფილა - ზოგადად, ეს პროცესი მიმდინარეობს არა მარტო ამ პარტიასთან, არამედ სხვა პოლიტიკურ ჯგუფებთან და სამოქალაქო საზოგადოების წარმომადგენლებთან, - ამის შესახებ „ნაციონალური მოძრაობის” პოლიტსაბჭოს თავმჯდომარე ლევან ბეჟაშვილმა პოლიტსაბჭოს შემდეგ ჟურნალისტებს განუცხადა.

მისივე თქმით, თანამშრომლობის მიზანი არა ინსტიტუციების გაერთიანება, არამედ ერთიანი სამოქმედო გეგმის შემუშავებაა. როგორც ბეჟაშვილი ამბობს, „ოპოზიციის მთავარი მიზანი უნდა იყოს არა ცალკეული მანდატების მოპოვება პარლამენტში, არამედ ერთობლივი ძალისხმევით “რუსული ოცნების” ჩამოშორება ხელისუფლებიდან”.

„ნაციონალურმა მოძრაობამ” ბევრ სხვადასხვა ოპოზიციურ პარტიას და პოლიტიკურ ლიდერს შესთავაზა, რომ საერთო სტრატეგია, სამოქმედო გეგმა შევიმუშაოთ „რუსულ ოცნებასთან” საბრძოლველად, ამიტომ ამ შეთავაზების ფარგლებში, ბუნებრივია, გიორგი ვაშაძესთან და „სტრატეგია აღმაშენებელთან” მიმდინარეობს კონსულტაციები. საუბარი არაა პარტიულ, ინსტიტუციურ გაერთიანებაზე, არამედ საუბარია სამოქმედო გეგმაზე, ბრძოლის ერთობლივ მეთოდებზე. მნიშვნელოვანია, სხვა ოპოზიციურმა პარტიებმა ასევე შექმნან თავიანთი პოლიტიკური ერთიანობის ცენტრები. იქნება ეს „ლელო”, „გირჩი” - მათთანაც აუცილებლად ვითანამშრომლებთ”, - განაცხადა ლევან ბეჟაშვილმა.