როდესაც ოპოზიციური გაერთიანების ლიდერად ისეთ პოლიტიკოსს ირჩევენ, ვისაც ოპოზიციურ მიტინგზეც კი მიკროფონი წაართვეს და ტრიბუნიდან ჩამოაგდეს, გასაგებია, როგორი კრიზისი აქვთ პარტიაში, - ასე ეხმაურება უმრავლესობის დეპუტატი გურამ მაჭარაშვილი "ნაციონალური მოძრაობისა" და "სტრატეგია აღმაშენებლის" გაერთიანებას.

მაჭარაშვილის თქმით, გიორგი ვაშაძე მიხვდა, რომ მისი პარტია ვერანაირ საარჩევნო ბარიერს ვერ გადალახავს, ამიტომ საკუთარი პარტიიდან გავიდა და „ნაციონალური მოძრაობის“ საარჩევნო სიაში ჩაწერას ცდილობს.

ამ კონტექსტში მაჭარაშვილმა აღნიშნა ისიც, რომ „ნაციონალური მოძრაობა“ ის პარტიაა, რომელიც პარლამენტში 36 დეპუტატით შევიდა, მაგრამ ახლა 20 დეპუტატით არის წარმოდგენილი და პარლამენტის უფლებამოსილების დასრულებამდე შეიძლება ათი წევრიც აღარ დარჩეს.

„საზოგადოებამ ასეთი ე.წ. გაერთიანებები ოპოზიციურ სპექტრში არაერთხელ იხილა. რამდენიმე თვის წინ იყო ე.წ. ტროიკის - ვაშაძე-ხოშტარია - ზურაბ გირჩი ჯაფარიძის გაერთიანება. საზოგადოებას არც ის ახსოვს როგორ გაერთიანდნენ და მერე როგორ დაიშალნენ. ამიტომ ასეთი გაერთიანებები მარცხისთვის არის განწირული“, - განაცხადა გურამ მაჭარაშვილმა.