კრემლის მეხოტბეებს კარგად უნდა ესმოდეთ, რომ ოკუპაცია და ასეთი დამოკიდებულება დასვენებასთან და გართობასთან შეუთავსებელია, - ამის შესახებ „ევროპული საქართველოს“ პოლიტსაბჭოს თავმჯდომარემ, გიგი წერეთელმა განაცხადა.

ის ბათუმში რუსული გემის შემოსვლაზე გამართულ საზოგადოებრივ პროტესტს გამოეხმაურა და აღნიშნა, რომ ხალხის ასეთი მძაფრი რეაქცია გასაკვირი არაა.

როგორც მან განაცხადა, იმ ადამიანების მიმართ, ვინც კრემლის მეხოტბეები არიან, კიდევ მეტი პროტესტი უნდა იყოს.

„როგორც გაირკვა, არიან ადამიანები, რომლებიც თვლიან, რომ საქართველოსა და რუსეთში მდგომარეობა ისეთი უნდა იყოს, როგორიც ახლაა - რომ ჩვენი ტერიტორიები უნდა იყოს ოკუპირებული, უკრაინაში უნდა იყოს ომი და რუსები უნდა ჩამოდიოდნენ საქართველოში დასასვენებლად, გასართობად, თითქოს, ეს ჩვეულებრივი მოვლენაა. მათ კარგად უნდა ესმოდეთ და ეს პროტესტიც ზუსტად ამის გზავნილია, რომ ოკუპაცია და დასვენებასთან, გართობასთან ასეთი დამოკიდებულება შეუთავსებელია. ასეთი რამ არ უნდა ხდებოდეს, ჩვენი ხელისუფლება კი ამას ჩვეულებრივად იღებს, ისე, როგორც რუსეთთან მოთანამშრომლე სხვა ხელისუფლება მოიქცეოდა“, - განაცხადა წერეთელმა.