„ერთიანი ნაციონალური მოძრაობის“ გენერალური მდივნის მოადგილის, ირაკლი ფავლენიშვილის განცხადებით, პარტია „რუსული სისტემის“ წინააღმდეგ ბრძოლაში ჩართულია და ამ პროცესში მთავარი როლი ექსპრეზიდენტ მიხეილ სააკაშვილს აქვს.

როგორც მან აღნიშნა, მიხეილ სააკაშვილს უნდა ჰქონდეს პოლიტიკურ პროცესებში ჩართვის საშუალება, „სხვანაირად გამარჯვებისთვის ბრძოლას ყველაზე მნიშვნელოვანი ელემენტი დააკლდება“.

„ჩვენი პარტია რუსული სისტემის წინააღმდეგ გადამწყვეტ ბრძოლაში გამარჯვებისთვის ჩართულია. ამ ბრძოლაში მთავარი როლი აქვს მიხეილ სააკაშვილს, როგორც ამ პარტიის დამფუძნებელს და მთავარ ოპოზიციურ ლიდერს ჩვენს ქვეყანაში. ამიტომ, მისი და მისი პერსონალური წარმომადგენლის ეს აქტიურობა ძალიან მნიშვნელოვანი იქნება. საჭიროების შემთხვევაში, პარტია მთლიანად იქნება მომართული იმისთვის, რომ დაეხმაროს კონკრეტულ შეხვედრებში. მნიშვნელოვანია, რომ ეს არის საერთო ბრძოლა, ბრძოლა გამარჯვებისთვის და მიხეილ სააკაშვილს აქვს ცენტრალური როლი. ყველამ კარგად უნდა გავიგოთ - მიხეილ სააკაშვილი უნდა გამოვიდეს „ვივამედიდან“, მას უნდა ჰქონდეს პოლიტიკურ პროცესებში ჩართვის საშუალება, სხვანაირად გამარჯვებისთვის ბრძოლას ყველაზე მნიშვნელოვანი ელემენტი დააკლდება, ეს არის მომდევნო არჩევნების ლეგიტიმურობა იმიტომ, რომ თუ მთავარი ლიდერი პატიმრობაში იქნება, ვერც თანასწორად და ვერც სამართლიანად არჩევნებს ვერანაირად ვერ ჩავთვლით“, - განაცხადა ირაკლი ფავლენიშვილმა

ინფორმაციას „ერთიანი ნაციონალური მოძრაობის“ პრესსამსახური ავრცელებს.