უკრაინის თავდაცვის სამინისტროში, სექტემბრის პირველ კვირაში, შესაძლოა, ხელმძღვანელობის ცვლილება განხორციელდეს, - უკრაინული მედიის ინფორმაციით, ამის შესახებ ვერხოვნა რადას საფინანსო, საგადასახადო და საბაჟო პოლიტიკის კომიტეტის თავმჯდომარის პირველმა მოადგილემ იაროსლავ ჟელეზნიაკმა „ტელეგრამზე" დაწერა.

მისი ინფორმაციით, ოლექსი რეზნიკოვი, სავარაუდოდ, დიდ ბრიტანეთში ელჩად დაინიშნება, თავდაცვის სამინისტროს კი, სახელმწიფო ქონების ფონდის ხელმძღვანელი, რუსტემ უმეროვი უხელმძღვანელებს.

„ჩემი ინფორმაციით, მომავალ კვირას, ანუ სექტემბრის პირველ კვირას, რეზნიკოვი დატოვებს თავდაცვის მინისტრის პოსტს და დიდ ბრიტანეთში ელჩად წავა", - აცხადებს უკრაინელი დეპუტატი.