ვიზიარებ მიხეილ სააკაშვილის სულისკვეთებას - მნიშვნელოვანია მაქსიმალურად ვასხივებდეთ ერთობას, ვმუშაობდეთ ერთობისთვის და კონსოლიდაციისთვის, - ეს განცხადება მედიასთან ფრაქცია „ნაციონალური მოძრაობის“ თავმჯდომარემ თინა ბოკუჩავამ გააკეთა.

როგორც მან ამ კონტექსტში აღნიშნა, ოპოზიციური ერთობა ერთ საარჩევნო სიაში გაერთიანებას არ გულისხმობს, მაგრამ თანამშრომლობის განწყობა წინასაარჩევნოდ მნიშვნელოვანი იქნება.

“მაქვს შესაძლებლობა, ევროპელ თუ ამერიკელ პარტნიორებთან მჭიდრო ურთიერთობა მქონდეს. სამწუხაროდ, ამ ნაწილში მიხეილ სააკაშვილს უნდა დავეთანხმო, რომ ერთიანობასთან დაკავშირებით წუხილი არსებობს, რადგან საერთაშორისო გამოცდილება აჩვენებს, რომ ავტოკრატიული რეჟიმების დამარცხება შესაძლებელია ოპოზიციურ ფლანგზე გაერთიანების შემთხვევაში. გაერთიანებების ფონზე ოპოზიცია გაცილებით უფრო გაძლიერდება. ჩვენ ასეთ გაერთიანებებს ბიძგი მივეცით“, - განაცხადა თინა ბოკუჩავამ.