სპეციალური საგამოძიებო სამსახურის და საქართველოს ახალგაზრდა იურისტთა ასოციაციის წარმომადგენლებს შორის სამუშაო შეხვედრა გაიმართა. ინფორმაციას სპეციალური საგამოძიებო სამსახური ავრცელებს.

მათივე ცნობით, სპეციალური საგამოძიებო სამსახურის უფროსმა, კოკა კაციტაძემ, საქართველოს ახალგაზრდა იურისტთა ასოციაციის თავმჯდომარესთან შეხვედრაზე, დამოუკიდებელი საგამოძიებო სამსახურის განვითარებაში უფლებადამცველი ორგანიზაციების მნიშვნელოვან როლს გაუსვა ხაზი. ამასთან, ამ მხრივ, სამსახურის მზაობაზე გაამახვილა ყურადღება, აქტიურად ითანამშრომლოს მათთან სტრატეგიული დოკუმენტების შემუშავებისას.

„შეხვედრაზე მიმოიხილეს, სამსახურის მიერ უფლებადამცველი ორგანიზაციების ჩართულობით განხორციელებული პროექტები, რომლებიც მიმართული იყო მსხვერპლთა უფლებრივი მდგომარეობის გაუმჯობესების, გამჭვირვალე და ეფექტური გამოძიების სტანდარტების დასამკვიდრებლად.

საიას თავმჯდომარემ და პროგრამის დირექტორებმა სპეციალური საგამოძიებო სამსახურის წარმომადგენლებს საგამოძიებო პროცესის და ადამიანის უფლებათა ევროპული სასამართლოს გადაწყვეტილებების აღსრულების ეფექტურობასთან დაკავშირებით მათი ხედვა გაუზიარეს და გამოთქვეს მზაობა საგამოძიებო სამსახურთან სამომავლო მჭიდრო თანამშრომლობაზე.

სპეციალური საგამოძიებო სამსახური, უწყების ინსტიტუციური განვითარების პროცესში, მომავალშიც აქტიურად უზრუნველყოფს უფლებადამცველი ორგანიზაციების, მათ შორის, საქართველოს ახალგაზრდა იურისტთა ასოციაციის ჩართულობას და მათ აქტიურ მონაწილეობას.

შეხვედრას, სპეციალური საგამოძიებო სამსახურის უფროსის მოადგილე, ნათია სონღულაშვილი, საიას სამართლებრივი დახმარების პროგრამის დირექტორი, შორენა ლოლაძე და ადამიანის უფლებათა დაცვის პროგრამის დირექტორი, თამარ ონიანი ესწრებოდნენ“,-აღნიშნულია ინფორმაციაში.