საქართველოს მთავრობამ დეოლიგარქიზაციის სამოქმედო გეგმა მიიღო, სამუშაო პროცესი საკანონმდებლო ორგანოში დღეიდან გადაინაცვლებს. ამის შესახებ პარლამენტის ვიცე-სპიკერმა, არჩილ თალაკვაძემ ჟურნალისტებთან საუბრისას განაცხადა.

მისივე თქმით, ეს არის კომპლექსური სამოქმედო გეგმა, რომელიც მთლიანად უზრუნველყოფს, რომ საქართველომ დეოლიგარქიზაციის რეკომენდაცია ამომწურავად და სრულფასოვნად შეასრულოს.

„საქართველოს პრემიერ-მინისტრის ხელმძღვანელობით, გაიმართა ევროინტეგრაციის უწყებათაშორისი კომისიის სხდომა, სადაც დრო დაეთმო ერთ-ერთი მნიშვნელოვანი ევრორეკომენდაციის შესრულების საკითხს. ეს გახლავთ დეოლიგარქიზაცია და მასთან დაკავშირებული პაკეტი. განვიხილეთ სამოქმედო გეგმა, რომელიც უკვე შემუშავებულია ევროკავშირთან შეთანხმების შესაბამისად. ეს გახლავთ კომპლექსური სამოქმედო გეგმა, რომელიც მთლიანად უზრუნველყოფს, რომ საქართველომ ეს რეკომენდაცია ამომწურავად და სრულფასოვნად შეასრულოს. რას მოიცავს ეს გეგმა, ჩვენმა საზოგადოებამ რომ იცოდეს - ეს არის რიგი ამოცანებისა, რომელიც განსაზღვრულია თითოეული უწყებისთვის და რაზეც პარლამენტი მუშაობას განაგრძობს ამ კვირიდანვე. ეს ეხება როგორც პარტიების დაფინანსების საკითხს, ასევე ანტიკორუფციულ მიმართულებას, ანტიმონოპოლიურ რეგულაციებს, მედიაპლურალიზმს, მართლმსაჯულების სფეროს და პრაქტიკულად მოიცავს კომპლექსურ ღონისძიებებს, რომელიც ევროკავშირთან იყო განხილული და მათ მიერ იყო მოწოდებული რეკომენდაციის სახით,“ - განაცხადა თალაკვაძემ.