ჩრდილოეთ კორეის ლიდერის, კიმ ჩენ ინის რუსეთში ვიზიტის ფარგლებში, რუსეთსა და კორეის სახალხო დემოკრატიულ რესპუბლიკას სამხედრო-ტექნიკურ თანამშრომლობაზე ან სხვა საკითხებზე შეთანხმებები არ გაუფორმებიათ, ასეთი გეგმები არ არსებობდა, - ამის შესახებ რუსეთის პრეზიდენტის პრესსპიკერმა, დიმიტრი პესკოვმა ჟურნალისტებს განუცხადა.

„არც ამ და არც სხვა საკითხებზე არანაირი შეთანხმება არ გაფორმებულა, ასეთი გეგმები არ ყოფილა", - განაცხადა პესკოვმა, რომელსაც ჰკითხეს მოეწერა თუ არა ხელი რუსეთის ფედერაციასა და ჩრდილოეთ კორეას შორის სამხედრო-ტექნიკური თანამშრომლობის შესახებ რაიმე შეთანხმებას.

შეგახსენებთ, ოთხშაბათს, რუსეთისა და ჩრდილოეთ კორეის ლიდერებმა, ვლადიმერ პუტინმა და კიმ ჩენ ინმა კოსმოდრომ "ვოსტოჩნიზე" მოლაპარაკებები გამართეს.