ყველანაირი ინსინუაციებისა და სპეკულაციების გამოსარიცხად, პრეზიდენტის იმპიჩმენტის დღეს ჩვენ სხდომათა დარბაზიდან გამოვალთ - ყველა პოლიტიკურ ჯგუფს მოვუწოდებთ, მარტო დავტოვოთ „ქართული ოცნება“ საკუთარი „ქოცური“ პოლიტიკური დღის წესრიგის ამარა, - ეს განცხადება ჟურნალისტებთან ფრაქცია „ნაციონალური მოძრაობის“ დეპუტატმა ლევან ბეჟაშვილმა გააკეთა.

ბეჟაშვილი ირწმუნება, რომ კენჭისყრის დღეს მათი ფრაქციის 20 წევრიდან არც ერთი სასესიო დარბაზში არ იქნება.

მისივე შეფასებით, პრეზიდენტის იმპიჩმენტის პროცედურა არის ფიქცია, რომელიც ვერასდროს განხორციელდება.

„ქართულმა ოცნებამ“ აღნიშნული თემა იმ მიზნით შემოიტანა, რომ საკუთარი პოლიტიკური დღის წესრიგი შექმნას და საზოგადოების ყურადღება მთავარი საკითხებიდან ფიქციაზე გადაიტანოს. ბუნებრივია, ფრაქცია „ნაციონალური მოძრაობა“ ამ პროცესში მონაწილეობას არ მიიღებს.

მოვუწოდებთ სხვა ოპოზიციურ პარტიებსა და პოლიტიკურ ჯგუფებს, საერთოდ დავხუროთ ეს თემა - ნუ მივცემთ „ქართულ ოცნებასა“ და პრეზიდენტის ინსტიტუტს ამ თემით პოლიტიკური დივიდენდების მოგროვების შესაძლებლობას. ყველ პარტიას მოვუწოდებთ, გამოვიდეთ და „ქართული ოცნება“ ამ თამაშებში მარტო დავტოვოთ“, - განაცხადა ლევან ბეჟაშვილმა.