რუსეთის ფედერაციის თავდაცვის მინისტრი, სერგეი შოიგუ თეირანში ჩავიდა, სადაც ირანის სამხედრო მეთაურობასთან შეხვედრებს გამართავს.

ინფორმაციას რუსეთის თავდაცვის უწყებაზე დაყრდნობით, ირანული საინფორმაციო სააგენტო Tasnim-ი ავრცელებს.

სააგენტოს ცნობით, რუსული დელეგაცია ირანის სამხედრო ხელმძღვანელობასთან მორიგ შეხვედრას გეგმავს, რაც რუსულ-ირანული სამხედრო კავშირების გაძლიერებას შეუწყობს ხელს და ამ ორ ქვეყანას შორის თანამშრომლობის განვითარების მნიშვნელოვანი ეტაპი გახდება.

„სერგეი შოიგუ თეირანში ირანის შეიარაღებული ძალების გენერალური შტაბის უფროსის მოჰამად ბაგერის მოწვევით ჩავიდა. წინა შეხვედრაზე, რომელიც 28 ივნისს შედგა, მხარეებმა ორმხრივი სამხედრო და სამხედრო-ტექნიკური თანამშრომლობისა და საერთაშორისო მდგომარეობასა და რეგიონული უსაფრთხოების აქტუალური საკითხები განიხილეს", - ნათქვამია გავრცელებულ ინფორმაციაში.

მედიის ცნობით, რუსული დელეგაციის წევრები ირანის თავდაცვის მინისტრს, რეზა აშტიანსაც შეხვდებიან.