19:00 საათზე, პარლამენტის მიმდებარედ პარტია „ერთიანი ნაციონალური მოძრაობის - ახალგაზრდული ფრთის”, მოძრაობა „ნაბიჯის” წევრებმა და სამოქალაქო საზოგადოების პირებმა აქცია დააანონსეს.

ისინი მედიაში გავრცელებულ ინფორმაციას აპროტესტებენ, რომლის თანახმადაც რუსეთის სახელმწიფო დუმის დეპუტატის, სერგეი გავრილოვის უახლოესი გარემოცვის წევრი, მამუკა ფიფია საქართველოს საკანონმდებლო ორგანოში იმყოფებოდა.

მანამდე, 9 აპრილის ქუჩაზე შეკრებილები სკანდირებდნენ სიტყვებს: „რუსებო”, „მონებო”. პარალელურად, ისინი საქართველოს მოქალაქეებს გარეთ გამოსვლისკენ მოუწოდებდნენ.

ცნობისთვის, დღეს სტუდენტური პოლიტიკური ჯგუფის „ნაბიჯის” წევრები დაშვებული საშვების მიუხედავად საკანონმდებლო ორგანოში არ შეუშვეს. ამ ფაქტს ისინი პარლამენტის უკანა შესასვლელთან პარტია „ერთიანი ნაციონალური მოძრაობის - ახალგაზრდული ფრთის” და სამოქალაქო საზოგადოების წევრებთან ერთად აპროტესტებდნენ. აქციის მონაწილეები ამბობენ, რომ რუსეთის სახელმწიფო დუმის დეპუტატის, სერგეი გავრილოვის უახლოეს მეგობარს და კრემლის პროპაგანდისტს მამუკა ფიფიას საქართველოს პარლამენტში დეპუტატის სავარძელი დაუთმეს, ხოლო ისინი საკანონმდებლო ორგანოში არ შეუშვეს.