ეროვნული ბანკის შენობასთან შეკრებილი აქციის მონაწილეები - ოპოზიციონერი ლიდერები და მოქალაქეები პარლამენტისკენ მსვლელობით მიემართებიან, სადაც 19:00 საათზე დაგეგმილ აქციას შეუერთდებიან.

მოქალაქეებს სიტყვით მიმართა „ერთიანი ნაციონალური მოძრაობის“ ყოფილმა თავმჯდომარემ, ნიკა მელიამ.

„წავედით ყველანი რუსთაველისკენ, მორიგი საპროტესტო აქცია იქნება, ასე მოგვიწევს, არ იქნება დანებება, არ იქნება მოსვენება, არც ჩვენი და არც მათი“, -განაცხადა მელიამ.

აქციის მონაწილეები საქართველოს ეროვნული ბანკის დირექტორის მოვალეობის შემსრულებლის, ნათია თურნავას გადაწყვეტილებას აპროტესტებენ, რომლის მიხედვითაც, აშშ-ს მიერ სანქცირებულ ყოფილ გენერალურ პროკურორს, ოთარ ფარცხალაძეს საბანკო ანგარიშებზე წვდომა აღუდგა. ოპოზიციონერი პოლიტიკოსები აცხადებენ, რომ ეს ქართული საბანკო სისტემისთვის და ეკონომიკისთვის დამანგრეველია. მათივე თქმით, ახლა მნიშვნელოვანია, ნათია თურნავამ თანამდებობა დატოვოს.