უკრაინის პრეზიდენტის, ვოლოდიმირ ზელენსკის ვაშინგტონში ვიზიტის დროს აშშ-ის პრეზიდენტი, ჯო ბაიდენი უკრაინისთვის სამხედრო დახმარების რიგითი პაკეტის შესახებ განცხადებას გააკეთებს. ინფორმაციას "ამერიკის ხმა" ავრცელებს.

"მოსალოდნელია, რომ ზელენსკის ვაშინგტონში ვიზიტის დროს, რომელიც 21 სექტემბერს შედგება, ჯო ბაიდენი უკრაინისთვის სამხედრო დახმარების მნიშვნელოვან პაკეტზე განაცხადებს", – წერს გამოცემა.

როგორც ცნობილია, ბოლო თვეების განმავლობაში უკრაინული მხარე ამერიკისგან ATACMS-ის ტიპის შორსსასროლი სარაკეტო სისტემების მიწოდებას აქტიურად ითხოვს.

ვიზიტის ფარგლებში უკრაინის პრეზიდენტი აშშ-ის კონგრესში ყველა ამერიკელ სენატორს შეხვდება და დამსწრე საზოგადოებას სიტყვით მიმართავს, ამის შემდეგ კი, აშშ-ის პრეზიდენტი მას თეთრ სახლში უმასპინძლებს.

შეგახსენებთ, რომ ვოლოდიმირ ზელენსკის ვიზიტი უკრაინისთვის 23 მილიარდი აშშ დოლარის მოცულობის დამატებითი დახმარების გადაცემის თაობაზე თეთრი სახლის მოთხოვნის ფონზე მიმდინარეობს, მაგრამ ახალი დახმარების გამოყოფა ჯერჯერობით გაურკვეველია, რადგან "რესპუბლიკურ პარტიაში" ამ საკითხთან დაკავშირებით სერიოზული უთანხმოება არსებობს.