საკრებულოს სხდომა, რომელიც დეპუტატებს შორის ჩხუბის გამო შეწყვეტილი იყო, განახლდა.

ამ ეტაპისთვის, დარბაზში სიმშვიდეა. შეგახსენებთ, რომ შესვენების გამოცხადებამდე სხდომა ხმაურითა და დაპირისპირებით მიმდინარეობდა.

„ქართული ოცნების - დემოკრატიული საქართველოს“ წევრი, კონსტანტინე ზარნაძე და „ნაციონალური მოძრაობის“ დეპუტატი ირაკლი ეძგვერაძე ერთმანეთს ფიზიკურად დაუპირისპირდნენ. დაპირისპირება მას შემდეგ დაიწყო, რაც ირაკლი ეძგვერაძემ სიტყვით გამოსვლისას კონსტანტინე ზარნაძეს „არარაობა“ უწოდა. აღსანიშნავია, რომ ზარნაძემ საპასუხოდ ეძგვერაძის მისამართით დროშები ისროლა, რომელიც მაგიდაზე ეწყო.

მანამდე, დეპუტატებს შორის ფიზიკურ დაპირისპირებას წინ უძღოდა ფრაქცია „ქართული ოცნების - დემოკრატიული საქართველოს“ წევრს, კონსტანტინე ზარნაძესა და თბილისის საკრებულოს ფრაქცია „ერთიანი ნაციონალური მოძრაობის“ წევრს, ნინო კვიტაიშვილს შორის სიტყვიერი დაპირისპირება, რომელიც კონსტანტინე ზარნაძის სიტყვით გამოსვლას მოჰყვა.