პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ბრალდებულ ლაზარე გრიგორიადისის მამა, ბექა გრიგორიადისი სასამართლოს სხდომათა დარბაზიდან გააძევეს.

აღნიშნული გადაწყვეტილება მოსამართლე ზვიად შარაძემ მას შემდეგ მიიღო, რაც გრიგორიადისის მამას სასამართლოს დარბაზში წესრიგის დაცვისკენ რამდენჯერმე მოუწოდა.

ამ წუთებში, თბილისის საქალაქო სასამართლოში ჰაბიდოსკოპიური ექსპერტი გივი ჩიბირაშვილი იკითხება, რომელმაც საკვლევად მიღებულ ვიდეოჩანაწერებიდან შემთხვევის ადგილზე ლაზარე გრიგორიადისის ყოფნა დაადასტურა.

სწორედ, აღნიშნული მოწმის ჩვენებისას ბექა გრიგორიადისმა დარბაზიდან განაცხადა, რომ „ის ტანსაცმელი, რაც ექსპერტმა აღწერა, მას ეცვა და დაუმტკიცონ, რომ ის იყო“.

წესრიგის დარღვევის გამო, მოსამართლემ ბექა გრიგორიადისი სხდომათა დარბაზიდან გააძევა.

„შენს დარბაზში, რომ არ ვიჯდე, ბევრი მომაკლდება", - მიმართა მოსამართლეს გრიგორიადისმა.

ცნობისთვის, ლაზარე გრიგორიადისს, რომელსაც პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი, აღკვეთის ღონისძიების სახით პატიმრობა 31 მარტს შეეფარდა. გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ „ტოიოტა კოროლას“ მოდელის ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა. ლაზარე გრიგორიადისს ბრალდება საქართველოს სისხლის სამართლის კოდექსის 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით) და 187-ე მუხლის მეორე ნაწილის „ა“ ქვეპუნქტით (სხვისი ნივთის განადგურება, ცეცხლის წაკიდებით) წარედგინა, რაც სასჯელის ზომად 7-დან 11 წლამდე თავისუფლების აღკვეთას ითვალისწინებს. 7-8 მარტის საქმეზე სისხლის სამართლის კოდექსით ჯამში, 6 პირი დააკავეს, მათგან 5 ბრალდებული გირაოს სანაცვლოდ არის გათავისუფლებული.