„სტრატეგია აღმაშენებელი“ - ნანა ტოხვაძეს გივი მიქანაძემ კრიტიკული კითხვების დასმის გამო განათლების კომიტეტის სხდომა დაატოვებინა

„სტრატეგია აღმაშენებლის“ პოლიტიკური საბჭოს წევრსა და განათლების მიმართულების ხელმძღვანელს, ნანა ტოხვაძეს განათლების კომიტეტის სხდომა კომიტეტის თავმჯდომარემ, გივი მიქანაძემ კრიტიკული კითხვების დასმის შემდგომ დაატოვებინა. ამის შესახებ ნათქვამია „სტრატეგია აღმაშენებლის“ მიერ გავრცელებულ ინფორმაციაში.

„განათლების კომიტეტის სხდომაზე ხმაური ნანა ტოხვაძის მიერ წარმოდგენილ კონკრეტულ ფაქტებსა და დასმულ კითხვებს მოჰყვა, რომელიც სკოლებში უფასო კვებასა და ინფრასტრუქტურული ღონისძიებების არაჯეროვნად შესრულებას ეხებოდა.

კითხვას, თუ რატომ არ ხდება სკოლებში მიმდინარე სარეაბილიტაციო და სარემონტო სამუშაოების კონტროლი, კომიტეტის თავმჯდომარის უკმაყოფილება მოჰყვა, რის შემდეგაც ნანა ტოხვაძეს სხდომა დაატოვებინეს.

ცნობისთვის, განათლების კომიტეტის სხდომაზე გარდა აღნიშნული თემებისა, სტატუსშეჩერებული სტუდენტების საკითხიც განიხილებოდა, როდესაც გივი მიქანაძემ „თავისუფალ უნივერსიტეტი“ და „აგრარულ უნივერსიტეტი“ პრემიერის საწინააღმდეგო ქმედებაში დაადანაშაულა“, - ნათქვამია „სტრატეგია აღმაშენებლის“ მიერ გავრცელებულ ინფორმაციაში.