ევროპის ფრენბურთის ფედერაციის ეგიდით ბულგარეთის დედაქალაქ სოფიაში მწვრთნელთა გადამზადებისა და კვალიფიკაციის ასამაღლებელი კურსი ჩატარდა. აღნიშნულთან დაკავშირებით ინფორმაციას საქართევლოს ფრენბურთის ეროვნული ფედერაცია ავრცელებს.

ფედერაციის ცნობით, ტრენინგის მთავარი მიზანი სასკოლო ფრენბურთის განვითარება და სკოლებში მომუშავე მწვრთნელების გადამზადებაა. საქართველოს ფრენბურთის ეროვნული ფედერაციიდან ბულგარეთში 6 მწვრთნელი იმყოფებოდა. 2023 წლის CEV მწვრთნელთა შეკრებაზე მონაწილეებმა, როგორც თეორიული, ასევე პრაქტიკული ცოდნა მიიღეს.

რამდენიმე დღის განმავლობაში სპეციალური „ვორქშოფები“ გაიმართა, სადაც მონაწილეებმა სხვადასხვა პრაქტიკულ დავალებებზე იმუშავეს. ტრენინგში მონაწილეობა 160-ზე მეტმა მწვრთნელმა მიიღო, მსოფლიოს სხვადასხვა წერტილიდან. პირველ სესიაზე ისინი ევროპის ფრენბურთის ფედერაციის პრეზიდენტს, ალექსანდრე ბორიჩიჩსაც შეხვდნენ.