საერთაშორისო სავალუტო ფონდის კონკრეტული პოზიციის რაიმე ფორმით საქართველოში მიმდინარე პოლიტიკურ პროცესებზე „გადაბმა“ საფუძველს მოკლებულია, - ასე უპასუხა უმრავლესობის დეპუტატმა მიხეილ სარჯველაძემ IMF-ის პროგრამის შეჩერებასთან დაკავშირებით დასმულ კითხვას.

სარჯველაძე ამ თემაზე ევროპარლამენტარ ვიოლა ფონ კრამონის განცხადებას გამოეხმაურა და როგორც აღნიშნა, IMF-ის პროგრამის შეჩერებაზე სპეკულაციების წამოწყება არასწორია და „შეგნებულად ან დილეტანტობით საზოგადოების შეცდომაში შეყვანის მცდელობას წარმოადგენს“.

„არის კონკრეტული საკითხი, რაც კონკრეტულ კანონპროექტს უკავშირდება. აუცილებელია შემდგომი კონსულტაციები. ეს არამც და არამც დაკავშირებული არ არის იმ ცხელ პოლიტიკურ ფონთან, რასთან დაკავშირებასაც ჩვენი ქვეყნის ოპოზიცია და მის მხარდამხარ ვიოლა ფონ კრამონი ცდილობს“, - განაცხადა მიხეილ სარჯველაძემ.

ცნობისთვის, ევროპარლამენტარმა ვიოლა ფონ კრამონმა განაცხადა, რომ არა მხოლოდ ევროკომისია და ევროპარლამენტი არ არიან კმაყოფილი საქართველოს მთავრობის პროგრესით, არამედ საერთაშორისო სავალუტო ფონდიც.