აშშ-ის წარმომადგენელთა პალატაში "რესპუბლიკელებმა", რომლებიც პრეზიდენტ ჯო ბაიდენის იმპიჩმენტის გამოძიებას ხელმძღვანელობენ, პირველი მოსმენა გამართეს.

CNN-ი იუწყება, რომ "რესპუბლიკელებმა" იმპიჩმენტის გამოძიების მთავარ აქცენტად მისი შვილის, ჰანტერ ბაიდენის ბიზნეს გარიგებები აქციეს, თუმცა დღემდე არ გამოუვლენიათ მტკიცებულება, რომელიც აჩვენებს, რომ პრეზიდენტმა შვილის ბიზნეს საქმიანობიდან ფული მიიღო. მოწმეებმა, რომლებმაც კოლეგიის წინაშე ჩვენება მისცეს, განაცხადეს, რომ ჯერ კიდევ არ არის საკმარისი მტკიცებულება ბაიდენის იმპიჩმენტისთვის.

"რესპუბლიკელები" ამტკიცებენ, რომ ბაიდენმა და მისმა ოჯახმა ისარგებლეს იმ პოლიტიკით, რომელსაც ის ატარებდა ვიცე-პრეზიდენტის რანგში, ყოფილი პრეზიდენტის, ბარაკ ობამას ადმინისტრაციის დროს 2009-2017 წლებში.

ისინი ასევე ირწმუნებიან, რომ იუსტიციის დეპარტამენტი ჰანტერ ბაიდენთან დაკავშირებით მიმდინარე სისხლის სამართლის გამოძიებაში ჩაერია.ხუთშაბათს, წარმომადგენელთა პალატის ზედამხედველობის კომიტეტის თავმჯდომარემ, ჯეიმს კომერმა თქვა, რომ გამოძიების ფარგლებში გამოითხოვა საბანკო ჩანაწერები, რომლებიც ეკუთვნოდა ჰანტერ ბაიდენს და პრეზიდენტის ძმას, ფრენკ ბაიდენს.