საქართველოს პარლამენტის ეროვნული ბიბლიოთეკისა და მსჯავრდებულთა პროფესიული მომზადებისა და გადამზადების ცენტრის თანამშრომლობის შედეგად ციხეების ბიბლიოთეკარები გადამზადდნენ.

ამის შესახებ ინფორმაციას ეროვნული ბიბლიოთეკა ავრცელებს.

მათივე ცნობით, ეროვნული ბიბლიოთეკის მხარდაჭერით, ციხეების ბიბლიოთეკების განახლებაც დაიწყო.

„საოცრად ემოციური დღე გამოდგა: ქალთა სასჯელაღსრულებით დაწესებულებაში ბიბლიოთეკა განვაახლეთ. შევხვდი საოცარ ადამიანებს და მცირე ლექცია ჩავატარე: ,,დრო და სივრცე". პატიმარი ქალი, რომელმაც წერილი მომწერა ბიბლიოთეკაში ახალი წიგნების მიტანის და შეხვედრის სურვილის შესახებ - პრეზიდენტმა შეიწყალა. ჩვენ კი ქართული ციხეების ბიბლიოთეკების განახლება დავიწყეთ. მანამდე ყველა დაწესებულების ბიბლიოთეკარი გადავამზადეთ“, - ამბობს ეროვნული ბიბლიოთეკის დირექტორი გიორგი კეკელიძე.