გერმანიის კანცლერი ოლაფ შოლცი რუსეთის პრეზიდენტს, ვლადიმერ პუტინს აკრიტიკებს და აცხადებს, რომ მასზე ზეწოლას გაზრდის.

შოლცმა აღნიშნა, რომ პუტინის მსოფლმხედველობა ნებას აძლევს მას, „შეცვალოს ევროპის რუკა, იქ ხაზების შემდეგი პრინციპით დახაზვით: „ეს - თქვენია, ეს - ჩვენია“, მაგრამ ეს ასე არ უნდა მოხდეს“.

„ყველაფერს გავაკეთებ იმისთვის, რომ მნიშვნელოვნად გავზარდო ზეწოლა რუსეთის პრეზიდენტზე, რათა მან საბოლოოდ გააცნობიეროს, რომ უბრალოდ ვერ იტყვის: „მე გავაგრძელებ მანამ, სანამ არ მივაღწევ ჩემს მიზანს, რამდენი ადამიანის სიცოცხლედაც არ უნდა დაჯდეს ეს, მათ შორის საკუთარი ჯარისკაცების სიცოცხლედ“, - აღნიშნა შოლცმა.

მან ასევე მოუწოდა მსოფლიოს, გადადგას აუცილებელი ნაბიჯები, რათა უკრაინაში „პუტინის ომი“ საბოლოოდ დასრულდეს, რადგან რაც არ უნდა უთხრას პუტინმა მსოფლიოს, უკრაინაში მისი ქმედებების არსი უცხო სახელმწიფოს დაპყრობაა.

„ფაქტობრივად, ჩვენ ვსაუბრობთ ქვეყნის დაპყრობაზე და სხვა არაფერზე”, - აღნიშნა შოლცმა.