„ლელო“ - „ლელო" ერთადერთი პოლიტიკური პარტიაა, რომელიც იმპიჩმენტის პროცესში სასამართლოს მეგობრის სტატუსით მონაწილეობს

„ლელო" ერთადერთი პოლიტიკური პარტიაა, რომელიც იმპიჩმენტის პროცესში ოფიციალურად არის ჩართული და სასამართლოს მეგობრის სტატუსით მონაწილეობს. პარტიას საკონსტიტუციო სასამართლოში გენერალური მდივანი ირაკლი კუპრაძე და ცესკოს თავმჯდომარის მოადგილე „ლელოს" ერთ-ერთი ლიდერი გიორგი სიორიძე წარმოადგენენ, - ამის შესახებ ინფორმაციას პარტია „ლელო“ ავრცელებს.

მათივე ინფორმაციით, „ლელომ", "სასამართლოს მეგობრის" მოსაზრებით, ვრცელი სამართლებრივი დასკვნა წარუდგინა საკონსტიტუციო სასამართლოს და დასკვნაში სამართლებრივად და დეტალურადაა დასაბუთებული, რატომ არ არსებობს იმპიჩმენტის სამართლებრივი საფუძველი.

„ლელოს“ გენერალური მდივნის ირაკლი კუპრაძის განცხადებით, „ქართული ოცნების“ მთავარი მიზანია ხელი შეუშალოს ერთადერთი მაღალი თანამდებობის პირის მუშაობას ევროინტეგრაციის სასარგებლოდ.

„საკონსტიტუციო სასამართლოში კანდიდატის სტატუსის საბოტაჟის სპეცოპერაცია მიმდინარეობს. „ქართული ოცნების“ მიზანი ნათელია, ერთადერთი მაღალი თანამდებობის პირის მუშაობას ევროინტეგრაციის სასარგებლოდ, ხელი შეუშალოს“, - ირაკლი კუპრაძე.