„მერები ეკონომიკური ზრდისთვის“ - ინიციატივის ფარგლებში, ბათუმში რეგიონული ურბანული ფორუმი იმართება.

ამის შესახებ ინფორმაციას ქუთაისის მერია ავრცელებს.

მათივე განმარტებით, ფორუმის მიზანია ქალაქების წინაშე არსებული გამოწვევების ეფექტურად გადაჭრისა და კრიზისის მართვის გზების შემოთავაზება, ინოვაციური მიდგომებისა და სტრატეგიული თანამშრომლობის დანერგვა, რაც არსებულ ურბანულ სივრცეებს უფრო მწვანე, ჭკვიან და მდგრად გარემოდ გარდაქმნის.

ფორუმის მუშაობაში ქუთაისის მერი, იოსებ ხახალეიშვილი მონაწილეობს.

„ქუთაისის მუნიციპალიტეტში წარმატებით ხორციელდება ევროკავშირის (EU) და გაეროს განვითარების პროგრამის (UNDP) ინიციატივა „მერები ეკონომიკური ზრდისთვის” (M4EG) ფარგლებში მიმდინარე საგრანტო პროექტი „მუნიციპალიტეტის ტრანსფორმაციის პორტფელი“. ჩვენ მიზნად დავისახეთ, ქუთაისი გახდეს ლიდერი ქალაქი საქართველოში ეკო-სმარტ მიმართულებით.

ბათუმში მიმდინარე ფორუმზე ჩვენს კოლეგებსა და საერთაშორისო პარტნიორებს გავაცანით ამ მიმართულებით ქუთაისში უკვე გადადგმული ქმედითი ნაბიჯები, ასევე, გავეცანით სხვა ქალაქების წარმატებულ პრაქტიკას და გამოცდილებას",- განაცხადა იოსებ ხახალეიშვილმა.