რუსულმა ძალებმა ხერსონის ოლქში, ბერისლავზე ავიაიერიშის საავადმყოფოს შენობას დაარტყეს, - ინფორმაციას უკრაინული მედია ხერსონის საოლქო-სამხედრო ადმინისტრაციის ხელმძღვანელზე, ალექსანდრე პროკუდინზე დაყრდნობით ავრცელებს.

მისი ინფორმაციით, თავდასხმის შედეგად შენობის მეოთხე სართული მთლიანად დაინგრა, არიან დაშავებულები.

„ბერისლავში საავადმყოფოზე პირდაპირი დარტყმა განხორციელდა. მეოთხე სართული მთლიანად დაინგრა, კიდევ ერთი სართული კი ნაწილობრივ დანგრეულია. მტრის თავდასხმის შედეგად დაზიანდა სასწრაფო დახმარების მანქანებიც“, - აცხადებს პროკუდინი.

მისი თქმით, დაშავდა სასწრაფო სამედიცინო დახმარების ორი თანამშრომელი. ინფორმაცია ჯერ კიდევ ზუსტდება.