„საქართველოს ფოსტამ“ და ეროვნულმა ბიბლიოთეკამ საოკუპაციო ხაზთან მდებარე სოფლებს წიგნები გადასცა
„საქართველოს ფოსტისა“ და საქართველოს ეროვნული ბიბლიოთეკის თანამშრომლები საოკუპაციო ხაზთან არსებულ სოფლებს ეწვივნენ.
„საქართველოს ფოსტის“ გენერალურმა დირექტორმა ლევან ჩიკვაიძემ და საქართველოს ეროვნული ბიბლიოთეკის ხელმძღვანელმა გიორგი კეკელიძემ საოკუპაციო ხაზთან არსებული სოფლების ბიბლიოთეკებს წიგნები გადასცეს.
ამის შესახებ ინფორმაციას „საქართველოს ფოსტა“ ავრცელებს.
მათივე ცნობით, „საქართველოს ფოსტასა“ და საქართველოს პარლამენტის ეროვნულ ბიბლიოთეკას შორის, მიმდინარე წელს, ხელი მოეწერა მემორანდუმს, რომელიც საოკუპაციო ხაზთან არსებულ სოფლებში ბიბლიოთეკების მოწყობას ისახავს მიზნად. აღნიშნულ ეტაპზე, წიგნები ზუგდიდის მუნიციპალიტეტის შემდეგი სკოლების ბიბლიოთეკებს გადაეცა: სოფელი რუხის საჯარო სკოლა, სოფელ რიყის საჯარო სკოლა და სოფელ ახალაბასთუმნის საჯარო სკოლა.
„პროექტი ერთი წელი გრძელდება. საქართველოს პარლამენტის ეროვნული ბიბლიოთეკა წიგნების თემატურად შერჩევას, ხოლო „საქართველოს ფოსტა“ შეძენასა და მიწოდებას უზრუნველყოფს.
მნიშვნელოვანია, რომ „საქართველოს ფოსტა“ კორპორაციული სოციალური პასუხისმგებლობის მატარებელ აქტივობებში აქტიურად არის ჩართული“, - აღნიშნულია გავრცელებულ ინფორმაციაში.
