ანა დოლიძე - ჩვენ გვჭირდება განვითარება მაღალ ტექნოლოგიებზე დაყრდნობით, რათა სწრაფი ეკონომიკური ზრდა გვქონდეს
პარტია „ხალხისთვის“ თავმჯდომარე თბილისსა და რეგიონებში მოქალაქეებთან შეხვედრას, მათი პრობლემების მოსმენას და ადგილზე გაცნობას განაგრძობს.
ამის შესახებ ინფორმაციას პარტია „ხალხისთვის“ ავრცელებს.
პარტიის ცნობით, ანა დოლიძე ამჯერად სამეგრელოს სოფელ ჩხორიას ეწვია და ადგილობრივებთან შეხვედრის შემდეგ ბიბლიოთეკა დაათვალიერა.
„როდესაც მთელი სამყარო გადადის ციფრულ ტექნოლოგიებზე და განვითარებულ ქვეყნებში ცოდნა მაღალი ტექნოლოგიების მეშვეობით, სწრაფად ვრცელდება, საქართველო ამ ტენდენციებს ჩამორჩება.
დავათვალიერე სოფელ ჩხორიას ბიბლიოთეკა. მიუხედავად თანამშრომლების თავდადებისა, ჩანს, რომ ბიბლიოთეკა ჩარჩენილია 50-იანი წლების განვითარების დონეზე.
ჩვენ გვჭირდება განვითარება, სწრაფ, მაღალ ტექნოლოგიებზე დაყრდნობით. იმისთვის, რომ გვქონდეს სწრაფი ეკონომიკური განვითარება”, - აცხადებს ანა დოლიძე.
გავრცელებული ინფორმაციის თანახმად, პარტია „ხალხისთვის“ ლიდერი დედაქალაქსა და რეგიონებში ადგილობრივებთან შეხვედრებს მომავალშიც გააგრძელებს. პარტიის ცნობით, ანა დოლიძე მოქალაქეების ხმას ხელისუფლებამდე მიიტანს, რათა მოსახლეობას პრობლემების გადაჭრაში დაეხმაროს.
