ადვოკატის განცხადებით, 7 ნოემბრის საქმეზე მესამე პრეზიდენტის მიმართ პოლიტიკურად მოტივირებული სისხლის სამართლებრივი დევნა მიმდინარეობს
საქართველოს მესამე პრეზიდენტის წინააღმდეგ პოლიტიკურად მოტივირებული სისხლის სამართლებრივი დევნა მიმდინარეობს. ეს არის საქმე, რომელშიც მიხეილ სააკაშვილის წინააღმდეგ არანაირი მტკიცებულება არ არის, - ამის შესახებ საქართველოს მესამე პრეზიდენტის ადვოკატმა, ბექა ბასილაიამ თბილისის საქალაქო სასამართლოში განაცხადა, სადაც 7 ნოემბრის საქმეზე მიხეილ სააკაშვილის სასამართლო პროცესი გაიმართება.
ბასილაიას თქმით, დღევანდელი პროცესი მტკიცებულებათა ხელახლა გამოკვლევით გაგრძელდება.
„ეს არის საქმე, რომელზეც მესამე პრეზიდენტის მიმართ პოლიტიკურად მოტივირებული სისხლის სამართლებრივი დევნა მიმდინარეობს, საქმე, რომელშიც მიხეილ სააკაშვილის წინააღმდეგ არანაირი მტკიცებულება არ არის. შესაბამისად, თუ რა მტკიცებულებას წარმოადგენს ბრალდების მხარე, თუ ვის დაკითხავს, ამას საბოლოო ჯამში იურიდიული შინაარსი არ გააჩნია, თუ მოსამართლე იქნება მოწოდების სიმაღლეზე და ყველაფერს თავის სახელს დაარქმევს. და რა არის ეს სახელი? ის, რომ საქართველოს მესამე პრეზიდენტის წინააღმდეგ პოლიტიკურად მოტივირებული სისხლის სამართლებრივი დევნა მიმდინარეობს,“ - განაცხადა ბექა ბასილაიამ.
ამასთან, ადვოკატი განმარტავს, რომ ტელეკომპანია „იმედში“ შესვლასთან დაკავშირებით, მიხეილ სააკაშვილის წინააღმდეგ, არანაირი მტკიცებულება არ არსებობს.
