სწორედ ასეთი მხარდაჭერა გვჭირდება, რასაც უნგრეთისგან და ორბანისგან ვხედავთ - გაუგებარია ორბანის კრიტიკა, მათ შორის, თავდასხმები მის მართვის სტილსა თუ სხვა საკითხებზე,- ამის შესახებ ჟურნალისტებთან საპარლამენტო უმრავლესობის წევრმა ნინო წილოსანმა განაცხადა.

ამასთან, წილოსანი გამოეხმაურა კრიტიკას იმასთან დაკავშირებით, რომ ორბანი არ შეხვდა ოპოზიციას და აღნიშნა, რომ „არ არის დარწმუნებული, რომ ასეთი მაღალი დონის ვიზიტების დროს, ვინმე ხვდებოდეს ოპოზიციას“.

„სწორედ ასეთი მხარდაჭერა გვჭირდება ევროკავშირისა და მეგობარი ქვეყნების მხრიდან, როგორსაც უნგრეთისგან და ვიქტორ ორბანისგან ვხედავთ. მკაფიო და ერთმნიშვნელოვანი განცხადებები საქართველოსთვის სტატუსის მინიჭებასთან დაკავშირებით, მხოლოდ და მხოლოდ ეხმარება ქვეყანას. ამიტომ სრულებით გაუგებარია ოპოზიციური რადიკალური პარტიების და მათი მხარდამჭერების მხრიდან ვიქტორ ორბანის კრიტიკა, მათ შორის, თავდასხმები მის მართვის სტილსა თუ სხვა საკითხებზე. ვფიქრობ, ახლა ყველა უნდა ვკონცენტრირდეთ საერთო ძალისხმევაზე, რომ საქართველომ სტატუსი მიიღოს. ვფიქრობ, ეს არის ორმხრივი სარგებელი. არავის, მათ შორის, ევროკავშირსაც არ უნდა აწყობდეს, რომ საქართველო ამ მნიშვნელოვან პროცესში სტატუსის გარეშე დარჩეს”, - განაცხადა წილოსანმა.