წლის ბოლომდე მოლდოვა საჰაერო სივრცის მართვის თანამედროვე სისტემებს მიიღებს, - ამის შესახებ მოლდოვის თავდაცვის მინისტრმა, ანატოლი ნოსატიმ განაცხადა.

„ჩვენ საჰაერო თავდაცვის სისტემებს ეტაპობრივად მივიღებთ. მათ რამდენიმე კომპონენტი, სათვალთვალო მექანიზმები გააჩნიათ. აქ საუბარია რადარებსა და საჰაერო თავდაცვის რაკეტებზე. მონიტორინგის სისტემების მიღება წლის ბოლომდე მოხდება“, - განაცხადა ნოსატიმ.

მოლდოვის თავდაცვის მინისტრმა განაცხადა, რომ ქვეყნის თავდაცვის სამინისტრო რამდენიმე პროექტშია ჩართული, რომელთა მიზანს ეროვნული არმიის მოდერნიზება და მოძველებული სამხედრო ტექნიკის ახლით ჩანაცვლება წარმოადგენს. ანატოლი ნოსატიმ აღნიშნა, რომ საჰაერო სივრცის მართვის სისტემებს მოლდოვა ბიუჯეტიდან გამოყოფილი თანხებით შეიძენს, თუმცა მას კონკრეტული ღირებულება არ დაუსახელებია.