ისრაელის თავდაცვის ძალებში აცხადებენ, რომ ღაზაში, ალ-შიფას საავადმყოფოსთან ახლომდებარე შენობაში მეორე ისრაელელი მძევლის ცხედარიც აღმოაჩინეს.

თავდაცვის ძალების განცხადებაში ნათქვამია, რომ ისრაელის თავდაცვის ძალების კაპრალის, 19 წლის ნოა მარჩიანოს ცხედარი ისრაელის ტერიტორიაზე გადაასვენეს.

„ჰამასმა“ რამდენიმე დღის წინ ვიდეო გაავრცელა, სადაც ნათქვამია, რომ მარჩიანო ისრაელის საჰაერო თავდასხმას ემსხვერპლა.

შეგახსენებთ, ისრაელის თავდაცვის ძალებმა მანამდე გაავრცელა ინფორმაცია, რომ ალ-შიფას საავადმყოფოს ახლომდებარე შენობაში 65 წლის მძევლის, იეჰუდიტ ვაისის ცხედარი იპოვეს. იეჰუდიტ ვაისი „ჰამასმა“ მძევლად 7 ოქტომბრის თავდასხმის დროს აიყვანა, მისი ქმარი კი მოკლეს.