პარტია „ანა დოლიძე ხალხისთვის“ პიროტექნიკის გაყიდვის მკაცრ რეგულირებას და რიგ შემთხვევებში მის აკრძალვა ითხოვს.

როგორც პარტიის ლიდერი, ანა დოლიძე აცხადებს, ეს საკითხი მათ თბილისის საკრებულოში გასულ წელსაც დააყენეს, თუმცა შედეგი არ მოჰყოლია. ამასობაში კი, ანა დოლიძის თქმით, ძალიან დიდი ზიანი მიადგა არაერთი ადამიანის ჯანმრთელობას და მთლიანად გარემოს.

„გასული წლების სტატისტიკა აჩვენებს, რომ ასაფეთქებელ საშუალებებს უმეტესად არასრულწლოვანები ყიდულობენ და მოიხმარენ. პიროტექნიკის არასწორი გამოყენება კი ხშირად დამწვრობითა და სხეულის მძიმე დაზიანებებით სრულდება. გასაგებია, რომ არასრულწლოვანებისთვის ასაფეთქებელი საშუალებების მიყიდვას კანონი არეგულირებს, მაგრამ რეალურად რა ხდება ქუჩებში, ყველა ვხედავთ.

ჩვენი პარტია უკვე დიდი ხანია ითხოვს, რომ თბილისის მუნიციპალიტეტში უზრუნველყოფილი იყოს, საჯარო სივრცეებისა და კონკრეტული საზოგადოებრივი თავშეყრის ადგილების განსაზღვრა, სადაც აიკრძალება პიროტექნიკის გამოყენება დღის ნებისმიერ მონაკვეთში, მათ შორის სადღესასწაულო დღეებშიც.

მინდა გითხრათ, რომ ის, რასაც ჩვენ ვითხოვთ, სკვერებში, კორპუსების ტერიტორიაზე, საავადმყოფოებთან და სხვა ასეთ ადგილებთან პიროტექნიკის გამოყენების აკრძალვას, ეს პრაქტიკა დიდი ხანია არსებობს გერმანიასა და ბელგიაში.

ჩვენს პარტიას ასევე მიაჩნია, რომ პიროტექნიკის შეძენისა და გამოყენების პროცესში უნდა გაკონტროლდეს აკუსტიკური ხმაურის სიხშირე. კერძოდ, აიკრძალოს 30 დეციბელზე მაღალი სიხშირის აკუსტიკური ხმაურის გამომწვევი პიროტექნიკის გამოყენება თბილისის მუნიციპალიტეტში.

მოგეხსენებათ, აკუსტიკური ხმაურის ჭარბი სიხშირე ზიანს აყენებს შინაური ცხოველების: ძაღლების/კატების ჯანმრთელობას და სიცოცხლეს.

გავუფრთხილეთ ერთმანეთს, გარემოს, ჩვენს ოთხფეხა მეგობრებს და ერთად ვიზეიმოთ პასუხისმგებლობიანი ახალი წელი“, - აცხადებს ანა დოლიძე.