ევროკავშირი ღაზაში ჰუმანიტარული დახმარების მუშაკების დაღუპვის ფაქტის საფუძვლიან გამოძიებას ითხოვს

ევროკავშირი ღაზის სექტორში საქველმოქმედო ორგანიზაცია World’s Central Kitchen-ის თანამშრომლების დაღუპვასთან დაკავშირებით საფუძვლიან გამოძიებას ითხოვს.

„ვგლოვობთ World’s Central Kitchen-ის ჰუმანიტარული დახმარების მუშაკებს ოჯახებთან და მეგობრებთან ერთად, რომლებიც ღაზაში დაიღუპნენ. ჰუმანიტარული დახმარების მუშაკები ყოველთვის უნდა იყვნენ დაცული საერთაშორისო ჰუმანიტარული სამართლის შესაბამისად. მოვუწოდებთ, ამ ტრაგედიის საფუძვლიანი გამოძიებისკენ“, - აღნიშნულია ევროკომისიის განცხადებაში.

ევროკავშირმა, აშშ-სთან და კვიპროსთან ერთად, მნიშვნელოვანი როლი ითამაშა ღაზის სექტორისთვის ხმელთაშუა ზღვის გავლით დახმარების მიწოდების მიზნით საზღვაო დერეფნის ჩამოყალიბებაში. საპილოტე მიწოდება გემით, რომელიც საქველმოქმედო ორგანიზაცია World Central Kitchen-ის მიერ მოწოდებული 200 ტონა საკვები პროდუქტებით იყო დატვირთული, ღაზაში მარტში განხორციელდა.

შეგახსენებთ, გავრცელებული ინფორმაციით, ისრაელი სამხედროების მიერ განხორციელებულ თავდასხმას ღაზის სექტორში საქველმოქმედო ორგანიზაცია World Central Kitchen-ის 7 თანამშრომელი ემსხვერპლა, რომლებიც ავსტრალიის, პოლონეთის, გაერთიანებული სამეფოს, აშშ-ის, კანადისა და პალესტინის მოქალაქეები არიან. მომხდარის გამო, World Central Kitchen-მა რეგიონში მუშაობა შეაჩერა.