მნიშვნელოვანია აღინიშნოს, რომ პირველად, სომხეთმა და აზერბაიჯანმა საკითხი მოლაპარაკებების მაგიდასთან გადაწყვიტეს, - ამის შესახებ სომხეთის პრემიერ-მინისტრმა, ნიკოლ ფაშინიანმა განაცხადა.

„არ ვისურვებდი, რომ ის, რაც მოხდა გადამეტებულად შეგვეფასებინა, მაგრამ არც ამის დაკნინება მსურს, რადგან ძალიან მნიშვნელოვანია აღინიშნოს, რომ ფაქტობრივად პირველად, სომხეთმა და აზერბაიჯანმა საკითხი მოლაპარაკებების მაგიდასთან გადაწყვიტეს“, - განაცხადა ნიკოლ ფაშინიანმა.

ასევე, სომხეთის პრემიერ-მინისტრმა დაადასტურა, რომ რუსი მესაზღვრეები ტავუშის რეგიონს დატოვებენ.

„რუსული ბაზები იქ შექმნილი სიტუაციის გამო გაჩნდა და ის რაც ახლა ხდება, რა თქმა უნდა, სიტუაციის მნიშვნელოვან ცვლილებას წარმოადგენს და ამ ცვლილებას თავისი ეფექტი ყველა მიმართულებით უნდა ჰქონდეს“, - აღნიშნა სომხეთის პრემიერ-მინისტრმა.

ნიკოლ ფაშინიანმა აღნიშნა, რომ სომხეთისა და აზერბაიჯანის სასაზღვრო დაცვის სამსახურების ხელმძღვანელები უკვე კონტაქტზე არიან.

შეგახსენებთ, გუშინ, სომხეთისა და აზერბაიჯანის საზღვრის დემარკაციის სახელმწიფო კომისიების სხდომა გაიმართა, რომელზეც მხარეები შეთანხმდნენ, რომ სომხეთი აზერბაიჯანს ოთხ სოფელს დაუბრუნებს.