სახელმწიფო სათანადო პასუხისმგებლობით ეკიდება საკუთარ ვალდებულებას, იზრუნოს ბავშვთა უფლებების დაცვაზე, მომავალშიც ამ სულისკვეთებით გაგრძელდება მუშაობა, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს ნინოწმინდის ბავშვთა პანსიონთან დაკავშირებულ კითხვაზე საპასუხოდ განუცხადა.

მთავრობის მეთაურმა აღნიშნა, რომ თუ რაიმე გამოსაძიებელია, ეს შესაბამისი საგამოძიებო უწყებების საქმეა.

„გამოძიება არის შესაბამისი უწყებების საქმე. სახელმწიფო სათანადო პასუხისმგებლობით ეკიდება საკუთარ ვალდებულებას, იზრუნოს ბავშვთა უფლებების დაცვაზე. მომავალშიც ამ სულისკვეთებით გაგრძელდება მუშაობა. რაც შეეხება კონკრეტულ ფაქტებს, თუ რაიმე არის გამოსაძიებელი, ეს არის შესაბამისი საგამოძიებო უწყებების საქმე", - აღნიშნა პრემიერმა.

ინფორმაციისთვის, გაეროს კომიტეტმა დაადგინა, რომ ნინოწმინდის პანსიონში საქართველომ ვერ დაიცვა ბავშვები ძალადობისა და შეურაცხყოფისგან და სახელმწიფოს კომპენსაციის გაცემა მოსთხოვა.