„ერთიანობა - ნაციონალური მოძრაობის“ წევრი, შავი ზღვის საპარლამენტო ასამბლეის ვიცე- პრეზიდენტი რამაზ ნიკოლაიშვილი აზერბაიჯანის საპარლამენტო არჩევნების მონიტორინგის საერთაშორისო მისიას ხელმძღვანელობდა.
ამის შესახებ ინფორმაციას „ერთიანობა - ნაციონალური მოძრაობის“ პრესსამსახური ავრცელებს.
რამაზ ნიკოლაიშვილის განცხადებით, აზერბაიჯანში ჩატარებულ არჩევნებს ისტორიული მნიშვნელობა ჰქონდა, რადგან პირველად ჩატარდა არჩევნები აზერბაიჯანის ტერიტორიული აღდგენის შემდეგ.
„დავესწარით საპარლამენტო არჩევნებს აზერბაიჯანში, წარმოვადგენ საქართველოს და ორგანიზაციას, რომლის ვიცეპრეზიდენტი ვარ და ჩემს მეგობრებთან ერთად მქონდა შესაძლებლობა დავსწრებოდი არჩევნებს, რომელიც თავისი მოწყობით უნიკალური იყო იმ ნაწილში, რომ პირველად ისტორიაში არჩევნები მთელი აზერბაიჯანის ტერიტორიაზე ჩატარდა. ეს ყველა აზერბაიჯანელისთვის იყო დღესასწაული. აზერბაიჯანელებმა ეს არჩევნები როგორც დღესასწაული ისე მიიღეს, თავის რჩეულს მისცეს ხმა. ჩვენთვის მნიშვნელოვანი ქვეყანაა და მასთან ურთიერთობა ძალიან მნიშვნელოვანია. მე ვიცი აზერბაიჯანის პრეზიდენტის აზრი საქართველოს ევროინტეგრაციასთან დაკავშირებით და ალიევი თავიდან ბოლომდე მხარს უჭერს საქართველოს, მიუხედავად იმისა, რომ აზერბაიჯანს განაცხადი გაკეთებული არ აქვს. ჩვენ გვჭირდება მშვიდი და განვითარებული აზერბაიჯანი, ამიტომ ჩვენ ყოველდღე ურთიერთობას უნდა ვალაგებდეთ ამ ქვეყანასთან, რომ მივაღწიოთ წარმატებებს, რომ ჩვენი ეკონომიკა გაიზარდოს და გვქონდეს ჩვენი ძლიერი მეზობლის იმედი, ამიტომ ვფიქრობ, რომ ეს არჩევნები მნიშვნელოვანი იყო, ჩამოყალიბდება პარლამენტი და შესაბამისად მათთან დავამყარებთ ურთიერთობებს“, - განაცხადა რამაზ ნიკოლაიშვილმა.
