სემეკსა და GCCA-ს შორის ურთიერთთანამშრომლობის მემორანდუმი გაფორმდა
საქართველოს კონკურენციისა და მომხმარებლის დაცვის სააგენტოსა (GCCA) და საქართველოს ენერგეტიკისა და წყალმომარაგების მარეგულირებელ ეროვნულ კომისიას (სემეკ) შორის ურთიერთთანამშრომლობის მემორანდუმი გაფორმდა. შეთანხმებას ხელი მოაწერეს GCCA-ის თავმჯდომარემ, ირაკლი ლექვინაძემ და სემეკის თავმჯდომარემ, დავით ნარმანიამ. აღნიშნულის შესახებ ინფორმაციას სემეკი ავრცელებს.
სემეკის ცნობით, ურთიერთთანამშრომლობის მემორანდუმის მიზანს წარმოადგენს ენერგეტიკის სექტორში კონკურენციის კანონმდებლობის აღსრულების, კონკურენციის პოლიტიკის ეფექტიანად წარმართვისა და ჯანსაღი კონკურენტული გარემოს ხელშეწყობა, მომხმარებლის უფლებების დაცვის პოლიტიკის ეფექტიანად წარმართვა, კონკურენციისა და მომხმარებლის უფლებების დაცვის საკითხებზე საზოგადოებრივი ცნობიერების ამაღლება.
მხარეებმა გამოთქვეს მზადყოფნა ენერგეტიკის სფეროში კონკურენტული გარემოს გაუმჯობესებისა და მომხმარებლის უფლებების დაცვის მიზნით ჩაატარონ ერთობლივი ღონისძიებები, კანონმდებლობის ცალკეული დებულებების დახვეწისათვის მოამზადონ წინადადებები. ამასთანავე, მხარეები შეთანხმდნენ ახალი მიდგომების შემუშავებაზე, პრეცედენტული გადაწყვეტილებების გაზიარებასა და ერთგვაროვანი პრაქტიკის დამკვიდრებაზე.
