ირანის სამხრეთ ხორასანის პროვინციაში ქვანახშირის მაღაროში გაზის აფეთქებას სულ მცირე 51 ადამიანი ემსხვერპლა, დაშავებულია 20 ადაიანი, - ინფორმაციას ირანის სახელმწიფო მედია ავრცელებს.

მათივე ინფორმაციით, მეთანის გაზის აფეთქება ორ ბლოკში, B და C ბლოკებში, მოხდა. მაღარო კომპანია „მადანჯოს“ საკუთრებაა.

”ქვეყნის ქვანახშირის 76 პროცენტის მოწოდება ამ რეგიონიდან ხდება და იქ დაახლოებით 8-10 დიდი კომპანია მუშაობს, მათ შორის კომპანია „მადანჯო“, - აღნიშნა სამხრეთ ხორასანის პროვინციის გუბერნატორმა, ალი აქბარ რაჰიმიმ.

მისი თქმით, სამაშველო ოპერაცია B ბლოკში დასრულებულია. იქ მყოფი 47 მუშიდან 30 დაიღუპა და 17 დაშავდა. C ბლოკში კი სამაშველო სამუშაოები, ჯერჯერობით, ისევ მიმდინარეობს.

ირანის პრეზიდენტმა, მასუდ პეზეშკიანმა დაღუპულთა ოჯახებს მიუსამძიმრა, რომ ხელისუფლება ყველაფერს გააკეთებს მომხდარის მიზეზების დასადგენად.