ეს ბრძოლა დღეს არ დაწყებულა, ეს არის პროცესი და სხვა ეტაპია უბრალოდ ამ პროცესში. ხალხი როცა ავტოკრატიის დასრულებას აპირებს, ზუსტად ისე მოიქცევა, როგორც დღეს მოიქცა, - ამის შესახებ “კოალიცია ცვლილებისთვის” ლიდერმა ნიკა მელიამ რუსთაველზე, აქციის დასრულების შემდეგ ჟურნალისტებთან განაცხადა.

მელიას თქმით, საზოგადოებამ მანდატი ოპოზიციურ პოლიტიკურ ჯგუფებს მისცა და ამის უტყუარი მტკიცებულებები არსებობს, რომელზეც უამრავი ადამიანი შესაბამის ჯგუფებში მუშაობს.

“ბრძოლა წინ მომავლისკენ, ევროპისკენ, ცივილიზაციისკენ, განვითარებისკენ. ეს ბრძოლა დღეს არ დაწყებულა, ეს არის პროცესი და სხვა ეტაპია უბრალოდ ამ პროცესში. ეს პროცესი ლოგიკურ დასასრულამდე მივა. ხალხი როცა ავტოკრატიის დასრულებას აპირებს, ზუსტად ისე მოიქცევა, როგორც დღეს მოიქცა - სიმტკიცით, სიმრავლით, დაუღლელობით, თანმიმდევრულობით თქვენ ნახავთ შედეგს და მე ვფიქრობ, დღევანდელმა დღემ ეს ყველაფერი დაადასტურა და ნათელყო პოლიტიკური ჯგუფების სათქმელი, რომელიც ითქვა მკაფიოდ, რომ არავინ აპირებს, მისცეს ლეგიტიმაცია ამ არჩევნებს, ამ პარლამენტს. საზოგადოებამ მანდატი მისცა პოლიტიკურ ჯგუფებს. უახლოეს პერიოდში, მათ შორის, კონკრეტული მტკიცებულებებით, უკვე ძალიან ბევრი ადამიანი შესაბამის ჯგუფში მუშაობს და ეს პროცესი გაგრძელდება ისე, როგორც გრძელდებოდა დღემდე, სანამ არ დასრულდება ის, რაც დასასრულებელია - უზურპაცია, ავტოკრატია და უსამართლობა”, - დასძინა მან.