საქართველოს განათლების, მეცნიერებისა და ახალგაზრდობის სამინისტროს მხარდაჭერით, წყალტუბოს მუნიციპალიტეტის სოფელ ტყაჩირის საჯარო სკოლას სრული რეაბილიტაცია ჩაუტარდა. ამის შესახებ ინფორმაციას განათლების სამინისტრო ავრცელებს.

მათივე ცნობით, თანამედროვე სტანდარტების შესაბამის სკოლას განათლების, მეცნიერებისა და ახალგაზრდობის მინისტრი ალექსანდრე წულაძე ეწვია, რომელიც ადგილზე გაეცნო განახლებულ სასწავლო ინფრასტრუქტურას.

„მინისტრი სკოლის პედაგოგებსა და ადმინისტრაციის წარმომადგენლებს შეხვდა, ახალ გარემოში სწავლის გაგრძელება მიულოცა და აღნიშნა, რომ თანამედროვე საგანმანათლებლო სივრცე როგორც მოსწავლეებს, ასევე, მასწავლებლებს საკუთარი ნიჭისა და შესაძლებლობების გამოვლენის კიდევ უფრო მეტ საშუალებას მისცემს.

ალექსანდრე წულაძემ პედაგოგებთან მასწავლებლის პროფესიული განვითარებისა და კარიერული წინსვლის სქემის დახვეწის საკითხები, სახელფასო პოლიტიკა, სკოლებში არსებული გამოწვევები და მათი გადაჭრის გზები განიხილა.

შეხვედრის დასასრულს, მინისტრმა მრავალწლიანი ნაყოფიერი მოღვაწეობისთვის ტყაჩირის საჯარო სკოლის ღვაწლმოსილი პედაგოგები დააჯილდოვა.

ღონისძიებას იმერეთის რეგიონში სახელმწიფო რწმუნებულის მოადგილე ბესიკ გოფოძე და წყალტუბოს მუნიციპალიტეტის მერი გენადი ბალანჩივაძე ესწრებოდნენ.

240 მოსწავლეზე გათვლილი სოფელ ტყაჩირის საჯარო სკოლის რეაბილიტაციის პროექტის ღირებულება 3 მლნ ლარამდეა.

ინფრასტრუქტურული პროექტის ფარგლებში, სასწავლო სივრცეების პარალელურად, ფუნქციონირებს საბუნებისმეტყველო და კომპიუტერული ლაბორატორიები, სპორტული დარბაზი, ექიმის კაბინეტი და რესურს ოთახი. სკოლა სრულად ადაპტირებულია შეზღუდული შესაძლებლობის მქონე პირებისთვის: მოეწყო ლიფტი, ადაპტირებული სანიტარული კვანძები და პანდუსი“, - ნათქვამია ინფორმაციაში.