შსს - ინფორმაცია, თითქოს უწყებას სხვადასხვა დეპარტამენტის თანამშრომლები ტოვებენ, სიმართლეს არ შეესაბამება და როგორც სამინისტროს, ასევე თითოეული თანამშრომლის დისკრედიტაციას ისახავს მიზნად
შინაგან საქმეთა სამინისტროს განცხადებით, მედიაში გავრცელებული ინფორმაცია, თითქოს უწყების თანამშრომლები სამსახურს ტოვებენ, სიმართლეს არ შეესაბამება.
როგორც შსს-ის მიერ გავრცელებულ განცხადებაშია აღნიშნული, მსგავსი ინფორმაციის გავრცელება უწყების და თითოეული თანამშრომლის დისკრედიტაციას ისახავს მიზნად.
რაც შეეხება განსაკუთრებულ დავალებათა დეპარტამენტის ოპერატიული დაგეგმვის სამმართველოს უფროსის, ირაკლი შაიშმელაშვილის მიერ თანამდებობის დატოვებას, შსს-ში აცხადებენ, რომ მან უწყებას სამსახურიდან დათხოვნის თაობაზე პირადი პატაკით მიმართა.
„გვსურს, გამოვეხმაუროთ სხვადასხვა მედიასაშუალებასა და სოციალურ ქსელში გავრცელებულ ინფორმაციას იმის შესახებ, რომ თითქოს შინაგან საქმეთა სამინისტროს სხვადასხვა დეპარტამენტის თანამშრომლები ტოვებენ უწყების რიგებს.
ხაზგასმით აღვნიშნავთ, რომ ინფორმაცია არ შეესაბამება სიმართლეს და შინაგან საქმეთა სამინისტროს, როგორც უწყების და თითოეული თანამშრომლის, დისკრედიტაციას ისახავს მიზნად.
ამასთან, ზოგიერთი მედიასაშუალებისა და პოლიტიკური ჯგუფების წევრების მხრიდან მიზანმიმართული ცრუ და გადაუმოწმებელი ინფორმაციის მიწოდება, ემსახურება საზოგადოებაში შინაგან საქმეთა სამინისტროს, როგორც სახელმწიფო ინსტიტუტის იმიჯის შელახვას.
რაც შეეხება, გუშინ გავრცელებულ ინფორმაციას, ვაცხადებთ, რომ შინაგან საქმეთა სამინისტროს მოსამსახურემ - განსაკუთრებულ დავალებათა დეპარტამენტის ოპერატიული დაგეგმვის სამმართველოს უფროსმა, ირაკლი შაიშმელაშვილმა პირადი პატაკით მიმართა შინაგან საქმეთა მინისტრს სამსახურიდან დათხოვნის თაობაზე“,- ნათქვამია განცხადებაში.
v-if="article.gallery" v-html="article.gallery"
